ಗಾಮನಗಟ್ಟಿ ಮಿಯಾವಾಕಿ ಉದ್ಯಾನವನದ ಅರಣ್ಯ ಬೆಳೆಸಿ ಪರಿಸರ ಸಂರಕ್ಷಣೆಗೆ ಮಾದರಿಯಾದ ಪಾಲಿಕೆ ಜ್ಯೂನಿಯರ್ ಎಂಜಿನಿಯರ್ ಮಂಜುನಾಥ ದೊಡ್ಡವಾಡ
ವೀರಮಾರ್ಗ ನ್ಯೂಸ್ : ಧಾರವಾಡ ಜಿಲ್ಲಾ : ಹುಬ್ಬಳ್ಳಿ : ಪರಿಸರ ಸಂರಕ್ಷಣೆ ಕುರಿತು ಕೇವಲ ಜಾಗೃತಿ ಮೂಡಿಸುವುದಲ್ಲದೆ, ತಾವೇ ಮುಂದಾಗಿ ಉದ್ಯಾನವನದಲ್ಲಿ ‘ಮಿಯಾವಾಕಿ ಅರಣ್ಯ’ ಬೆಳೆಸುವ ಮೂಲಕ ಮಹಾನಗರ ಪಾಲಿಕೆಯ ಜ್ಯೂನಿಯರ್ ಎಂಜಿನಿಯರ್ ಮಂಜುನಾಥ ದೊಡ್ಡವಾಡ ಅವರು ಹೊಸ ನಿರೀಕ್ಷೆ ಮೂಡಿಸಿದ್ದಾರೆ. ಧಾರವಾಡ ಜಿಲ್ಲೆಯ ಹುಬ್ಬಳ್ಳಿ ತಾಲೂಕಿನ ಗಾಮನಗಟ್ಟಿ ಸಮೀಪದ ಗಂಗೋತ್ರಿ ಪಾರ್ಕ್ನಲ್ಲಿ ಅವರು ಕೈಗೊಂಡಿರುವ ಈ ಪರಿಸರ ಸ್ನೇಹಿ ಕಾರ್ಯ ಸಾರ್ವಜನಿಕರ ಗಮನ ಸೆಳೆಯುತ್ತಿದೆ.
ಹುಬ್ಬಳ್ಳಿಯ ನವನಗರ ಮಹಾನಗರ ಪಾಲಿಕೆ ವಲಯ ಕಚೇರಿ-4ರಲ್ಲಿ ಜ್ಯೂನಿಯರ್ ಎಂಜಿನಿಯರ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಮಂಜುನಾಥ ದೊಡ್ಡವಾಡ ಅವರು ವಾರ್ಡ್ 28ರ ವ್ಯಾಪ್ತಿಯ ಗಂಗೋತ್ರಿ ಪಾರ್ಕ್ನಲ್ಲಿ ಉದ್ಯಾನಕ್ಕೆ ಮೀಸಲಾದ ಸುಮಾರು 20 ಗುಂಟೆ ಜಾಗದಲ್ಲಿ 200ಕ್ಕೂ ಹೆಚ್ಚು ಗಿಡಗಳನ್ನು ನೆಟ್ಟು ಮಿಯಾವಾಕಿ ಅರಣ್ಯ ನಿರ್ಮಿಸಿದ್ದಾರೆ. ಜಗ್ಗಲಿ, ಹೊಂಗೆ, ಬೇವು ಸೇರಿದಂತೆ ಆಕ್ಸಿಜನ್ ಹೆಚ್ಚಿಸುವ ಹಾಗೂ ಪರಿಸರ ಸಮತೋಲನ ಕಾಪಾಡುವ ವಿವಿಧ ಜಾತಿಯ ಸಸಿಗಳನ್ನು ನೆಟ್ಟು ಅವುಗಳ ಪೋಷಣೆಗೆ ವಿಶೇಷ ಗಮನ ಹರಿಸಿದ್ದಾರೆ.
ವಿಶೇಷವೆಂದರೆ, ಈ ಗಿಡಗಳಿಗೆ ತಮ್ಮ ಮನೆಯ ಬೋರ್ವೆಲ್ನಿಂದ ನೀರು ಪೂರೈಕೆ ಮಾಡುತ್ತಿದ್ದು, ಸಸಿಗಳ ಬೆಳವಣಿಗೆಗಾಗಿ ಅಗತ್ಯವಿರುವ ಪಾಲನೆ, ಪೋಷಣೆ ಹಾಗೂ ನಿರ್ವಹಣೆಯ ಸಂಪೂರ್ಣ ಹೊಣೆಗಾರಿಕೆಯನ್ನು ಸ್ವತಃ ಅವರೇ ಹೊತ್ತಿದ್ದಾರೆ. ತಿಂಗಳಿಗೊಮ್ಮೆ ಸಾವಯವ ಗೊಬ್ಬರವನ್ನು ತಮ್ಮ ಸ್ವಂತ ಖರ್ಚಿನಲ್ಲಿ ತರಿಸಿ ಗಿಡಗಳಿಗೆ ಹಾಕುತ್ತಿದ್ದು, ಪರಿಸರದ ಬಗ್ಗೆ ಇರುವ ಅವರ ಬದ್ಧತೆಯನ್ನು ಇದು ತೋರಿಸುತ್ತದೆ.
ಆಕ್ಸಿಜನ್ ಹೆಚ್ಚಳ–ತಾಪಮಾನ ನಿಯಂತ್ರಣಕ್ಕೆ ಆದ್ಯತೆ
ಮಿಯಾವಾಕಿ ಅರಣ್ಯದ ಉದ್ದೇಶ ಕೇವಲ ಗಿಡ ನೆಡುವುದಲ್ಲ; ಪರಿಸರ ಸಮತೋಲನ ಹಾಗೂ ನಗರ ಪ್ರದೇಶದಲ್ಲಿ ತಾಪಮಾನ ನಿಯಂತ್ರಣವೂ ಆಗಿದೆ. ಇದಕ್ಕಾಗಿ ಮಂಜುನಾಥ ದೊಡ್ಡವಾಡ ಅವರು ಹೆಚ್ಚು ಆಕ್ಸಿಜನ್ ನೀಡುವ ಸಸಿಗಳಿಗೆ ಆದ್ಯತೆ ನೀಡಿದ್ದಾರೆ. ಗಿಡಗಳ ಮಧ್ಯೆ ಸಮರ್ಪಕ ಅಂತರ ಬಿಟ್ಟು ವೈಜ್ಞಾನಿಕ ರೀತಿಯಲ್ಲಿ ಸಸಿ ನೆಡುವ ಮೂಲಕ ಎರಡು ವರ್ಷಗಳಲ್ಲಿಯೇ ಹಸಿರಿನ ಕವಚ ನಿರ್ಮಾಣವಾಗಿದ್ದು, ಗಿಡಗಳು ದೃಢವಾಗಿ ಬೆಳೆದಿವೆ.
ಪ್ರತಿ ಭಾನುವಾರ ಶ್ರಮದಾನ
ಕಚೇರಿಗೆ ರಜೆ ಇರುವ ದಿನಗಳಲ್ಲಿ ಸಹ ವಿಶ್ರಾಂತಿ ಪಡೆಯದೆ, ಮಿಯಾವಾಕಿ ಅರಣ್ಯದಲ್ಲೇ ಸಮಯ ಕಳೆಯುವ ಮಂಜುನಾಥ ದೊಡ್ಡವಾಡ ಅವರು ಗಿಡಗಳಿಗೆ ನೀರು ಹಾಕುವುದು, ಮಣ್ಣು ಸಡಿಲಿಕೆ ಮಾಡುವುದು, ಒಣ ಕೊಂಬೆ ತೆರವುಗೊಳಿಸುವುದು ಸೇರಿದಂತೆ ಹಲವು ಕೆಲಸಗಳನ್ನು ನಿರಂತರವಾಗಿ ಮಾಡುತ್ತಿದ್ದಾರೆ. ಪ್ರತಿ ಭಾನುವಾರ ಕನಿಷ್ಠ 2 ರಿಂದ 3 ಗಂಟೆಗಳ ಶ್ರಮದಾನ ಮಾಡುವ ಮೂಲಕ ಪರಿಸರ ಸೇವೆಗೆ ತಮ್ಮನ್ನು ಅರ್ಪಿಸಿಕೊಂಡಿದ್ದಾರೆ.
ಪಾಲಿಕೆಯ ಬೆಂಬಲ
ಮಂಜುನಾಥ ದೊಡ್ಡವಾಡ ಅವರ ಪರಿಸರ ಕಾಳಜಿಗೆ ಮಹಾನಗರ ಪಾಲಿಕೆಯೂ ಬೆನ್ನೆಲುಬಾಗಿ ನಿಂತಿದೆ. ಉದ್ಯಾನದಲ್ಲಿ ಮಿಯಾವಾಕಿ ಅರಣ್ಯ ನಿರ್ಮಿಸುವ ಚಿಂತನೆ ಬಂದಾಗ ಅಧಿಕಾರಿಗಳು ಪ್ರೋತ್ಸಾಹಿಸಿದ್ದು, ಪಾಲಿಕೆ ವತಿಯಿಂದ ಸಸಿ ನೆಡುವ ಕೆಲಸಕ್ಕೆ ಸಹಕಾರ ನೀಡಲಾಗಿದೆ. ಜೊತೆಗೆ ತಿಂಗಳಿಗೊಮ್ಮೆ ಸ್ವಚ್ಛತಾ ಸಿಬ್ಬಂದಿ ಗಿಡಗಂಟಿ ತೆರವುಗೊಳಿಸಿ ಉದ್ಯಾನವನ್ನು ಶುಚಿಗೊಳಿಸುತ್ತಿದ್ದಾರೆ.
ಇತರರಿಗೆ ಪ್ರೇರಣೆ ಗಂಗೋತ್ರಿ ಪಾರ್ಕ್ನಲ್ಲಿ ಬೆಳೆದಿರುವ ಮಿಯಾವಾಕಿ ಅರಣ್ಯವನ್ನು ನೋಡಿ ಪ್ರಜಾನಗರ ಪ್ರದೇಶದಲ್ಲಿಯೂ 1 ಎಕರೆಗೂ ಹೆಚ್ಚಿನ ಜಾಗದಲ್ಲಿ 300ಕ್ಕೂ ಹೆಚ್ಚು ಸಸಿ ನೆಟ್ಟು ಮಿಯಾವಾಕಿ ಅರಣ್ಯ ಬೆಳೆಸಲಾಗಿದೆ. ಇದರಿಂದಾಗಿ ಸಾರ್ವಜನಿಕರು, ಪರಿಸರ ಪ್ರೇಮಿಗಳು ಹಾಗೂ ಯುವಕರು ಗಂಗೋತ್ರಿ ಪಾರ್ಕ್ಗೆ ಭೇಟಿ ನೀಡಿ ಮಾಹಿತಿ ಪಡೆಯುತ್ತಿದ್ದಾರೆ.
ಜನರಿಗೆ ಪರಿಸರ ಕಾಳಜಿಯ ಸಂದೇಶ
“ಉದ್ಯಾನಗಳಲ್ಲಿ ಕೇವಲ ಲಾನ್ ಹಾಗೂ ಹೂವಿನ ಗಿಡಗಳ ಬದಲು ಹೆಚ್ಚು ಆಕ್ಸಿಜನ್ ನೀಡುವ ಮತ್ತು ಹಣ್ಣು ಬಿಡುವ ಗಿಡಗಳನ್ನು ನೆಟ್ಟರೆ ಪಕ್ಷಿಗಳಿಗೆ ಸಹ ಅನುಕೂಲವಾಗುತ್ತದೆ. ಪ್ರತಿ ಮನೆಯ ಎದುರು ಕನಿಷ್ಠ ಎರಡು ಗಿಡಗಳನ್ನು ನೆಟ್ಟರೂ ತಂಪಾದ ವಾತಾವರಣ ಹಾಗೂ ಉತ್ತಮ ಆಕ್ಸಿಜನ್ ದೊರೆಯುತ್ತದೆ,” ಎಂದು ಜ್ಯೂನಿಯರ್ ಎಂಜಿನಿಯರ್ ಮಂಜುನಾಥ ದೊಡ್ಡವಾಡ ಜನರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ.
ಹೆಚ್ಚುವರಿ ಪ್ರಮುಖ ಅಂಶಗಳು
ನಗರದಲ್ಲಿ ಹಸಿರು ವಾತಾವರಣ ನಿರ್ಮಾಣಕ್ಕೆ ಮಾದರಿ ಯೋಜನೆ ಎಂಬ ಮೆಚ್ಚುಗೆ ಸಾರ್ವಜನಿಕರಿಂದ ವ್ಯಕ್ತವಾಗುತ್ತಿದೆ.
ಪರಿಸರ ಸಂರಕ್ಷಣೆಯಲ್ಲಿ ಸರ್ಕಾರಿ ಸಿಬ್ಬಂದಿಯ ವೈಯಕ್ತಿಕ ಬದ್ಧತೆ ಇತರ ಅಧಿಕಾರಿಗಳಿಗೆ ಪ್ರೇರಣೆಯಾಗಿದೆ.
ಬೇಸಿಗೆ ಸಮಯದಲ್ಲಿ ಉಷ್ಣಾಂಶ ಕಡಿಮೆ ಮಾಡಲು ಮಿಯಾವಾಕಿ ಅರಣ್ಯ ಸಹಕಾರಿ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
ಶಾಲಾ-ಕಾಲೇಜು ವಿದ್ಯಾರ್ಥಿಗಳಿಗೆ ಪರಿಸರ ಶಿಕ್ಷಣದ ನೈಜ ಮಾದರಿ ಕೇಂದ್ರವಾಗಿ ಗಂಗೋತ್ರಿ ಪಾರ್ಕ್ ಬೆಳೆಯುತ್ತಿದೆ.
ಸ್ಥಳೀಯ ನಿವಾಸಿಗಳು “ಪ್ರತಿ ವಾರ್ಡ್ನಲ್ಲಿ ಇಂತಹ ಅರಣ್ಯ ಬೆಳೆದರೆ ಪರಿಸರ ಸುಧಾರಣೆ ಸಾಧ್ಯ” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
— ವರದಿ: ಸಂಗನಗೌಡ ಹೂವನ್ನವರ
